- సస్పెండ్ అయిన డీలర్తోనే రేషన్ పంపిణీ..! అధికారుల పర్యవేక్షణ ఎక్కడ..?
- కేసు నమోదైనా అదే కుటుంబంతో బియ్యం విక్రయాలు..! పీడీఎస్లో నిబంధనలు బేఖాతరా..?
- రేషన్ అక్రమాలపై చర్యలన్నీ కాగితాలకేనా..? సస్పెండ్ డీలర్ కుటుంబమే మళ్లీ రంగంలోకి..!
- అక్రమాలకు అడ్డుకట్ట ఎప్పుడూ..? సస్పెండ్ డీలర్ భర్త చేతుల్లోనే రేషన్ బియ్యం పంపిణీ..!
- సస్పెన్షన్ ఒక నాటకమేనా..? రేషన్ డీలర్ల అక్రమాల వెనుక ఎవరి అండ..?
నర్సింహులపేట, జూలై 12 (నమస్తే న్యూస్)
మహబూబాబాద్ జిల్లా నర్సింహులపేట మండలంలో ప్రజా పంపిణీ వ్యవస్థ (పీడీఎస్) నిర్వహణపై తీవ్ర అనుమానాలు వ్యక్తమవుతున్నాయి. ఇటీవల గోల్బోడుక తండాకు చెందిన రేషన్ డీలర్ అక్రమంగా పీడీఎస్ బియ్యాన్ని తరలిస్తుండగా పోలీసులు పట్టుకుని కేసు నమోదు చేశారు. అనంతరం సంబంధిత డీలర్ను సస్పెండ్ చేసినట్లు సమాచారం.అయితే ఆశ్చర్యకరంగా, జూలై నెలకు సంబంధించిన రేషన్ బియ్యం పంపిణీని అదే సస్పెండ్ అయిన డీలర్ భర్త నిర్వహిస్తున్నట్లు స్థానికులు ఆరోపిస్తున్నారు. కేసు నమోదై, డీలర్ సస్పెన్షన్లో ఉన్నప్పటికీ అదే కుటుంబ సభ్యులు రేషన్ పంపిణీ చేపట్టడం వెనుక అధికారుల నిర్లక్ష్యమా, లేక అండదండలా అనే ప్రశ్నలు వినిపిస్తున్నాయి.సస్పెన్షన్లో ఉన్న డీలర్కు బదులుగా ప్రత్యామ్నాయ ఏర్పాట్లు చేయాల్సిన అధికారులు ఎందుకు మౌనం వహించారని ప్రజలు ప్రశ్నిస్తున్నారు. ప్రజా పంపిణీ వ్యవస్థలో పారదర్శకత ఎక్కడ ఉందని, నిబంధనలు సామాన్యులకు మాత్రమేనా అంటూ లబ్ధిదారులు ఆగ్రహం వ్యక్తం చేస్తున్నారు.రేషన్ బియ్యం అక్రమాలపై కేసులు నమోదైనా, సంబంధిత వ్యక్తులే పంపిణీ కొనసాగిస్తే ప్రభుత్వ చర్యలపై ప్రజల్లో విశ్వాసం ఎలా ఏర్పడుతుందని పలువురు ప్రశ్నిస్తున్నారు. అక్రమాలకు పాల్పడుతున్న కొందరు రేషన్ డీలర్ల వెనుక అధికారుల అండ ఉందనే ఆరోపణలు కూడా వినిపిస్తున్నాయి.ఈ వ్యవహారంపై జిల్లా పౌర సరఫరాల శాఖ అధికారులు వెంటనే విచారణ జరిపి, వాస్తవాలను వెలుగులోకి తీసుకురావాలని, నిబంధనలు ఉల్లంఘించిన వారిపై కఠిన చర్యలు తీసుకోవాలని స్థానికులు డిమాండ్ చేస్తున్నారు.
About the Author
